Zer da pelbis-zoruaren sindrome miofasziala?

Pelbis-zoruaren sindrome miofasziala pelbisean kokatutako muskuluetako mina da, haztatzean tenkatuta dauden muskulu-zuntzetan kokatutako puntu abiarazleak dituena bereizgarri gisa.  

Tentsio muskularrak pelbis-zoruaren dinamika oztopatzen du eta, horrenbestez, pelbis-zoruaren koordinazioa, uzkurdura eta erlaxazio egokiak eragozten. 

Pelbiseko min kronikoaren kausa ohikoenetako bat da. Pelbiseko min kronikoa duten emakumeen % 60-90ek sindrome miofasziala dute, eta askotan mina eragiten duten beste kausa batzuekin lotuta agertzen da (endometriosia, bulbodinia, maskuriko minaren sindromea, etab.). 

¿Zer da pelbis-zorua?

Pelbisaren oinarria osatzen duten muskuluen, lotailuen eta ehun konektiboaren multzoa da pelbis-zorua. Pelbisean kokatutako organoei (maskuria, umetokia, ondestea) euskarria ematen die, eta mikzioaren eta sabelustearen funtzionamendu egokian parte hartzen du.

Pelbis-zoruko muskuluak borondatezko kontrolaren mende daude, eta organo pelbikoetarako euskarri-egitura osatzen dute, hamaka baten antzera. Uzkiko muskulu jasotzailea da haren osagai nagusia, eta kokzix-muskuluarekin batera, diafragma pelbiko deritzona osatzen dute. Inbutuaren forma du, eta pelbis-barrunbea bi zatitan banatzen du: goikoa (errai pelbikoak daude bertan) eta behekoa (edo iskion- eta ondeste-hobia)

.Diafragma pelbikoa baino beherago dago diafragma urogenitala, gernu-kontinentziaz ere arduratzen dena.

Pelbis-zorua osatzen duten muskuluen barruan, uzkiko muskulu jasotzailea hartzen da haren osagai nagusitzat. Hiru faszikulutan banatuta dago hura: pubis eta kokzix-faszikulua; pubis- eta ondeste-faszikulua; eta ilion- eta kokzix-faszikulua.   

Euskarri-mekanismoak kaltetu edo ahuldu egiten direnean, sintoma hauek agertzen dira: prolapsoa, gernuari lotutako sintomak (inkontinentzia, mikzio-urgentzia), digestioari lotutako sintomak eta min miofasziala.